Blue Tears 5: Falling Star's Fairy Curse (ကြွေလွင့်ကြယ်စင်ကျိန်စာ) - အပိုင်း(၂)

(၃)

              မျက်ရည်စက်တွေ ...၊ ဟုတ်တယ် ..။ ကျွန်တော်တွေ့ခဲ့တယ်။ အပြာရောင်ကို နောက်ခံထားပြီး ပျံဝဲနေတ့ အဲ့ဒီမျက်ရည်စက်တွေ...။

               ပြီးတော့ တစ်စုံတရာကို ဆက်ပြီးဖြတ်သန်းသွားတယ်။ တစ်စုံတစ်ခုထဲကို ဝင်ရောက်ပြီး မွန်းကြပ်မှုတွေကို စတင်ခံစားလိုက်ရတယ်။ အဲ့ဒီနောက်မှာတော့ ..။

              "အူဝဲ .... အူဝဲ..."

             "မွေးပြီတော့ .... မွေးပြီ...၊ ယောက်ျားလေးတဲ့..."

             ကျွန်တော်ဆေးရုံမှာရောက်နေတယ်..။ သူနာပြုဆရာမတွေကော၊ ကျွန်တော့်ရဲ့ မမေဖြစ်လာမယ့် မိန်းမကြီးတစ်ယောက်ကပါ ကျွန်တော့်ကိုပြုံးပြုံးကြီး စိုက်ကြည့်နေကြပါလေရဲ့။

                 နောက်ပြီး တံခါးဝမှာ ကျွန်တော့်ကိုစိုက်ကြည့်နေတဲ့ လူတစ်ယောက် ကျွန်တော်ကိုတွေ့ပြီး အဖြူရောင်အခိုးအငွေအဖြစ်ပျောက်ကွယ်သွားတာကိုလည်း သတိထားမိလိုက်ပါသေးတယ်။

                     နောက်နှစ်(၂ဝ)လောက်ကြာသွားတော့လေ .....။

× × × × × × ×

(၄)

                     "ဟဲ့ ... နွယ်ပင်၊ အဲ့ဒီဆရာက အရမ်းမှန်တာတဲ့ ...၊ ငါတို့သွားမေးကြည့်ကြမလား ..."

                     Marry ဆိုသောကောင်မလေးက နွယ်ပင့်ကိုမေးလိုက်ခြင်းဖြစ်သည်။

                     "သွားစမ်းပါဟာ .... ဒီလိုခေတ်ကြီးမှာ လိမ်ဆရာတွေ ဒီလောက်များတာ..၊ ဒါမျိုးတွေ အယုံကြည်မရှိပါဘူး ..."

                     "ဒီမှာ နွယ်ပင် ..၊ နင်သေချာလိုက်ကြည့်ပြီးမှ ပြောစမ်းပါ...၊ ဒီဆရာက သူများတွေလို အခကြေးငွေနဲ့ ကူညီပေးနေတဲ့ဆရာမျိုး မဟုတ်ဘူးဟ .... အပေးအယူတစ်ခုပဲရှိဖို့လိုတယ် ...."

                     "ဘာ .... အပေးအယူ ..၊ ဘယ်လိုအပေးအယူမျိုးလဲ ..."

                     "ဒီလိုဟ ..၊ သူ့ဆီက အကူအညီတောင်းတဲ့သူဆီက သူက အခကြေးငွေလုံးဝမတောင်းဘူးလေ၊ အပေးအယူအနေနဲ့ အကူအညီတောင်းတဲ့သူဆီက မျက်ရည်သုံးစက်ကိုပဲ ပူဇော်ခအနေနဲ့ယူတယ် ...."

                  "ဟယ် ... စိတ်ဝင်စားစရာပဲ ..၊ ဒီလိုလုပ်...၊ နင်အဲ့ကို ဝင်မေးဟာ..၊ ငါလိုက်ကြည့်လှည့်မယ် ..."

                 သူတို့နည်းနည်းလေး လမ်းလျှောက်လာလိုက်ရင်းနဲ့ တိုက်ပုလေးတစ်ခုရှေ့မှာ Marry ကရပ်လိုက်သည်။

                  တိုက်ပုလေးရှေ့မှာတော့ -

              "Third Eye Hollow"

         Free of Charge Power to Love

              လို့ရေးထားတဲ့ဆိုင်းဘုတ်လေးကို နွယ်ပင်တွေ့လိုက်ရသည်။

             သူတို့နှစ်ယောက်လုံး ဝင်သွားတော့ အထဲမှာ (၁၇)နှစ်ခန့်သာ ရှိသေးမည် ထင်ရသော ကောင်လေး တစ်ယောက်က ဖန်လုံးတစ်လုံးတင်ထားသော စားပွဲတစ်ခုရှေ့မှာ ထိုင်နေသည်ကို တွေ့လိုက်ရသည်။
               ကောင်လေးက မျက်လွှာကိုချထားသော်လည်း သူတို့နှစ်ဦး ဝင်လာတာကို သိဟန်တူသည်။ မျက်လွှာကိုမဖွင့်ဘဲနှင့်-
              "ဝင်ခဲ့ပါ"
              ဟုသာ အေးဆေးတည်ငြိမ်စွာဖြင့်ပြောလိုက်သည်။ Marry နှင့် နွယ်ပင်တို့နှစ်ဦးလုံး ဝင်လာပြီးနောက် နွယ်ပင်က ဖန်လုံးကို အကြည့်တွင် ဖန်လုံးမှရုတ်တရက် ကျွတ်ဆက်သွားသလို ဂျွတ်ခနဲ အသံတွေထွက်လာသည်။ ပြီးနောက်ဖြည်းဖြည်းခြင်း အက်ကွဲရာများပေါ်လာကာ နောက်ဆုံးတွင် ကွဲထွက်သွားပြီး ဖန်ကွဲစများ အခန်းအနှံ့လွင့်စင်ထွက်ကုန်ကြသည်။ ဖန်ကွဲစများသည် သူတို့သုံးဦးလုံးသို့ ထိမှန်ခြင်းမရှိပေမယ့် Marry နှင့် နွယ်ပင်တို့မျက်နှာမှာတော့ ထိတ်လန့်ခြင်းအရိပ်အယောင်လေးများ အနည်းငယ်သန်းလာသော်လည်း (၁၇)နှစ်အရွယ်ကောင်လေးကမူ -
               "ဘာဇိုရောနစ်ဆန်တာဂွန်"
                ဟု သာတီးတိုးရွတ်ဆိုလိုက်သည်။ တစ်ဆက်တည်းမှာပင် ...
              "ဘာဇိုရာနဲ့ ဖိတ်ခေါ်ပေးမှုကြောင့် နောက်ဆုံးမှာတော့ ရောက်လာခဲ့ရပြီပေါ့ ...။ မေးဖို့ မရည်ရွယ်တဲ့သူက အပြာရောင်မျက်ရည်စက်တွေကို အဖိုးအခအဖြစ် ပေးစရာမလိုဘူး ..၊ လာမေးမယ်ဆိုတဲ့ သူကတော့ အပြာရောင်မျက်ရည်စက်တွေအတွက် မျက်တောင်တွေကို မှေးစင်းချလိုက်ပါ ...."
               Marry က သူ့ကိုပြောမှန်းသိသဖြင့် မျက်တောင်များကို မှေးစင်းကာချလိုက်သည်။
             "စဉ်းစားကြည့်စမ်း ... မင်းမှာဝမ်းနည်းစရာတွေ ကြုံတွေ့ခဲ့ရတယ် ...။ သူတို့ကြောင့် .... သူတို့ကြောင့်လေ .... မင်းရဲ့အချစ်ဆုံးပါလို့ပြောတဲ့သူတွေကြောင့်ပေါ့ ....
               တီ ..... ရှန်...... တီ.......ရှန်"
                လူငယ်လေးက တီရှန် ဆိုသော စကားလုံးများကို ရွတ်ဆိုရင်း သစ်သားတုံးလေးတစ်ခုကို တုတ်လေးတစ်ချောင်းနှင့် ခေါက်နေသည်။ ခေါက်ပုံမှာ သာမန်ခေါက်ပုံမျိုး မဟုတ်ဘဲ မြန်လာလိုက်၊ နှေးသွားလိုက်နှင့်ပင်ဖြစ်နေချေ၏ ။
                 "တီ .... ရှန် .... တီ .... ရှန် ..."
                  ဆိုသောအသံနှင့် တစ်ထပ်တည်းမှာ ...
                 "တောက် .. တောက်..တောက်...တောက်"
                 ဆိုသောအသံက စည်းဝါးလိုက်နေသကဲ့သို့ပင် ..... ။
                  ကောင်လေးက နှုတ်မှရွတ်ဆိုနေမှုကို ရပ်တန့်လိုက်ပြီး သစ်သားတုံးကို တုတ်ချောင်းနှင့် နာနာလေးတစ်ချက် "တောက်"ခနဲအသံ တစ်ခန်းလုံးဟိန်းစေသည့်တိုင် ရိုက်ချလိုက်သည် ....။
                 "တောက် ...."
                 "ဘုတ်..."
                 သစ်သားရိုက်သံနှင့်အတူ Marry တစ်ယောက်လည်း ကြမ်းပြင်ပေါ်သို့ အရုပ်ကြိုးပြတ်လဲကျသွားသည် ...။ သူမ၏စိတ်အလျဉ်တို့သည်ကား အတိတ်ဆီသို့ခရီးနှင်ရင်း ..........

× × × × × × × ×

(၅)

                  Marry အတွေး၏ အတိတ်တစ်စထဲတွင် .....

                 ".............."

                 ကျောင်းကပွဲခန်းမတစ်လျှောက်မှာ စန္ဒရားသံက လွဲချော်မှုမရှိ စည်းချက်ကျနစွာ ပျံ့လွင့်လာသည်။

         

"The rain falls on my windows
And a coldness runs through my soul
And the rain falls, oh the rain falls
I don't want to be alone

I wish that I could Photoshop all our bad memories
'Cause the flashbacks
Oh, the flashbacks won't leave me alone

If you come back to me I'll be all that you need
Baby come back to me
Let me make up for what happened in the past

Come back, baby come back to me
Come back, I'll be everything you need
Come back, baby come back to me
Come back, you're one in a million"

                   ဒီသီချင်းသံကိုကြားသည်နှင့် တော်တော်များများက Utada သီဆိုထားသော Come Back To Me သီချင်းဟု လူတိုင်းသိကြသည်။ တကယ်တော့ ဒီသီချင်းမှာလည်း သူ့ရာဇဝင်နဲ့သူ ...။

                    အနောက်တိုင်းနိုင်ငံအချို့မှာ မရဏတီးလုံးဟု နာမည်ကျော်ကြားခဲ့သော သံစဉ်တစ်ခု ရှိခဲ့ဖူးသည်။ ထိုသံစဉ်ကို မည်သည့်တူရိယာနှင့်မဆို တီးခတ်သူတိုင်း တီးနေစဉ်မှာပင် နှလုံးသွေးရပ်ပြီး နေရာမှာတင် သေဆုံးသွားရသည်။

                  ဒီသီချင်းကလည်း အနောက်တိုင်း လောကီပညာ လိုက်စားသူများကြားထဲမှာ မိမိချစ်သူကို ပြန်လာစေနိုင်သော မှော်ဝင်သီချင်းတစ်ပုဒ်ဟု လူသိများကြသည်။

                  ချစ်သူပြန်မလာနိုင်တော့မှန်းသိပေမယ့်လည်း Marry ကတော့ မာန်ပါပါနဲ့ Come Back to Me သီချင်းနဲ့ ဖျော်ဖြေပြီးနောက် စင်ပေါ်မှဆင်းလာခဲ့သည်။

                  ဒီသီချင်းက သူများတွေအတွက် မှော်ဝင်သည့်ကိစ္စကတော့ ဟုတ်ချင် ဟုတ်ပေလိမ့်မည်။ ဒါပေမယ့် ... ဒါပေမယ့် Marry ရင်ထဲက ချစ်နေခဲ့ရသူက တခြားတစ်ယောက်နဲ့ လက်ထပ်သွားခဲ့ပြီ လေ ..။

                 တကယ်တော့ ဒီကျောင်းကပွဲနေ့က တိုက်တိုက်ဆိုင်ဆိုင်ပဲ သူ့ရဲ့မင်္ဂလာပွဲနေ့ပဲလေ...။

               Marry ရဲ့ ပါးပြင်တစ်လျှောက်မှာမျက်ရည်ပူပူနွေးနွေးလေးစီးကျ လာသော်လည်းနွေဦးလေပြေ 

ရဲ့ တိုက်ခတ်မှုကြောင့် ခဏချင်းမှာပင် မျက်ရည်ကြောင်းတို့ ခြောက်ကပ်သွားသည်။ ထို့အတူ Marry ဘဝသည်လည်းပဲ အနာဂတ်မှာ ခြောက်သွေ့တော့မယောင် .....။ Marry အရင်က ချစ်သူဘဝကို သတိရမိလာပြီး သူမလည်ပင်းမှာဆွဲထားသော Triple Plane ဟုဆိုသော ဂြိုဟ်သားစီးသည့် ယာဉ်ပျံပုံစံ ဆွဲကြိုးလေးကို ကိုင်ကြည့်မိပြီး သူပြောသော ပုံပြင်လေးတစ်ပုဒ်အကြောင်းကိုသတိရလာမိသည်။ ထိုအခိုက်မှာပင်Triple Planeပုံစံ ခေါက်ချိုးချိုးထားသော စက္ကူခေါက်လေးက လေထဲမှာ ဝေ့ကာ ဝဲကာဖြင့် Marry ၏အရှေ့သို့ ကျရောက်ထိမှန်လာသည်။
               Marry ကတော့ အတွေးနှင့် အတွေ့တစ်ထပ်တည်းကျနေသဖြင့် စိတ်ဝင်စားကာ စက္ကူုရုပ်ကို ကောက်ကာ ဆွဲဖြန့်လိုက်သည်။ သူထင်သည့်အတိုင်းပင် စာထဲတွင်ရေးထားသည်ကတော့ -
             "တရားမျှတမှုအတွက် ငါသူ့ကို လက်ထပ်ခွင့်မပေးဖြစ်လိုက်ဘူး ....။ ဒါပေမယ့် Marry စိတ်ဝင်စားရင်လာကြည့်လိုက်ပါ .... ကျွန်တော်သူ့ကိုအခြားတစ်ယောက်နဲ့လက်ထပ်ခွင့်မပေးဘဲ ဘာလုပ်လိုက်သလဲဆိုတာကိုပေါ့ ....
                                                                                                   ပုံ
                                                                                     The Judge of Love
                                                                                     အချစ်ရဲ့တရားသူကြီး "

                  စာထဲမှာရေးထားတဲ့အတိုင်းဆို သူမ ဘယ်မှာ လာကြည့်မရလဲ ...။ သူမချစ်သူကော ဘာတွေဖြစ်နေပြီလဲ ..။ ပတ်ဝန်းကျင်ကိုဝေ့ဝဲကာကြည့်လိုက်တော့ ပျံသန်းနေသော ရီမုတ်ဖြင့်ထိန်းချုပ်နိုင်သော Triple Plane အရုပ်လေးကိုတွေ့သောကြောင့် Triple Plane အရုပ်လေး ပျံသန်းနေရာနောက်ကိုသာ လိုက်၍လိုက်၍သာ သွားပါတော့သည်....။

အချစ်ရဲ့တရားသူကြီးဆိုတာကဘယ်သူလဲ ...။
Triplane ဆိုတဲ့ ဇာတ်လမ်းလေးကကောဘယ်လိုလဲ။ Marry နဲ့ဘယ်လိုပတ်သတ်နေလဲ ..။

အပိုင်း(၃)ကိုဆက်လက်ဖတ်ရှုကြပါရန်

ကာရှိုင်း (ကြယ်စင်ချစ်သူ)

KCB Center

Filed Under: အခန်းဆက် on Monday, January 26, 2015

Blue Tears 5: Falling Star's Fairy Curse (ကြွေလွင့်ကြယ်စင်ကျိန်စာ) - အပိုင်း(၁)

 (၁)

                        ဟုတ်တယ်......။ ကျွန်တော်သူ့ကိုချစ်ခဲ့တာ။ သူ့အနားမှာ သက်တော်စောင့်တစ်ယောက်လိုပဲ နေချင်ခဲ့တာ။

                        ခုတော့လည်းလေ .....

                        စားအတူ၊ သွားအတူ၊ လာအတူ၊ အိပ်အတူပဲပေါ့...။ ဒါဆို ကျွန်တော့်ဆန္ဒတွေ ပြည့်ဝနေခဲ့ပြီပဲလေ။ ဒါပေမယ့် ကျွန်တော်ဘာ့ကြောင့် မပျော်ပိုက်နိုင်ရတာလဲ။ 

                        တစ်စက္ကန့်အချိန်လေးတောင်မှ အပြုံးကို ဘာကြောင့်များ မျက်နှာပေါ်မှာ တင်မထားနိုင်ရတာလဲ ...။

                       အတူအမြဲ မခွဲမခွါ၊ ထာဝရရှိနေပေမယ့် မမြင်ရဘဲ ခံစားလို့သာရတဲ့ ချစ်ခြင်းတရားမှာ အနှောင့်အယှက်တစ်ခု ရှိနေတာကတော့ သေချာတယ်။ 

                       ကျွန်တော့်ချစ်သူကောင်မလေးရဲ့အသက်က(၄)နှစ်။ နောက်ပြီး ကျွန် .... ကျွန်တော်က ....

                      "မေမေ .... သမီးနဖူးတွေနာလာပြန်ပြီ .... အီးဟီးဟီး ...."

                      ကျွန်တော့်ချစ်သူရဲ့ငိုသံကြောင့် သူ့မိဘတွေဝင်လာလို့ ကျွန်တော်လည်း ကျွန်တော့်ချစ်သူရဲ့ နောက်မှာ ဝင်ပုန်း ခဲ့တယ်။

                      အော် ... ပြောဖို့မေ့နေလို့ ...။ ကျွန်တော့်အသက်ကလဲ(၄)နှစ်ပါ။ ခဏကြာတော့ သူ့မိဘတွေဝင်လာတယ်။

                      "သမီး .. နွယ်ပင် .... နဖူးတွေကနာလာပြန်ပြီလား .... "      

                      နွယ်ပင့် မိဘတွေက သူတို့သမီးနဖူးနာတာကိုသာ မြင်ပြီး ကျွန်တော့်နှလုံးသားက နာလာတာကို မမြင်ကြပါ။

                     တကယ်တမ်းတော့ နွယ်ပင့်ရဲ့ နဖူးနာတိုင်း ကျွန်တော့်နှလုံးသားနာကျင်ခံစားရမြဲ။

                     ကျွန်တော်နဲ့နွယ်ပင်ရဲ့ ဆက်စပ်မှုကတော့ နဖူးနဲ့နှလုံးသားကြားက မရဏကွာရှင်းစာတစ်ခုကြောင့်ပါပဲ ...။

                     အဲ့ဒီတစ်ခုတည်းကြောင့်ပါပဲ ...။ အဲ့ဒီတစ်ခုတည်းပါ။

× × × × × × × × ×

(၂)

                     "Tik Tok ..... Tik Tok .... Tik Tok"

                     တစ်ချက်ချက်မြည်နေတဲ့ နာရီသံတွေကြားမှာ နွယ်ပင် ကတော့ အိပ်မောကျနေပါတယ်။

                     ကျွန်တော်ကတော့ ထုံးစံအတိုင်း သူ့ရဲ့သက်တော်စောင့်ဆိုတော့ မအိပ်ဘဲ တစ်ညလုံး သူ့အနားမှာပဲပေါ့...။

                     ကျွန်တော်လေ... သူ့အနားမှာရှိနေပေမယ့်လည်း သူ့နဖူးပေါ်က ကွဲပြားခြားနားတဲ့ အရာတစ်ခုကို ကြည့်နိုင်လောက်အောင် ခွန်အားမရှိ်ခဲ့ပါဘူး။ ကွဲပြားခြားနားတဲ့ အဲ့ဒီအရာကို ကျွန်တော်ဖတ်မိရင် ကျွန်တော့်နှလုံးသား နာကျင်လာလိမ့်မယ်။

                     ဟင့်အင်း...။ ကျွန်တော့်နှလုံးသားကို မနာကျင်စေချင်ဘူး..။ ကျွန်တော့်နှလုံးသားနာကျင်ရင် နွယ်ပင့်ရဲ့ နဖူးပြင်လေးပါ နာကျင်ရမှာ...။

                    ဖြစ်နိုင်မယ်ဆိုရင်လေ နွယ်ပင့်ရဲ့ အနာရတ်ကို ကျွန်တော်ပြင်ကြည့်ချင်တယ်။ မြန်မာနာမည်မဟုတ်တဲ့ သူ့ရဲ့ဖူးစာရှင်နာမည် Gothic ဆိုတာအပြင် တခြားအနာဂတ်တွေအပါအဝင်ပေါ့...။

                   တကယ်တော့ လူတစ်ယောက်မှာဖြစ်ပျက်မယ့်တစ်သက်စာအချက်အလက်တွေအကုန်လုံးကို သူတို့ရဲ့ မျက်ခုံးနှစ်ခု အလယ်စပ်နား နှာခေါင်းနဲ့နဖူးစပ်ကြားနေရာလေးက မမြင်နိုင်တဲ့ အခေါင်းပေါက်လေးတစ်ခုထဲမှာ စကြဝဠာသုံး ဘာသာစကား (Universal Language) နဲ့သိုလှောင်ထားတာ...။

                   ဟုတ်ပါတယ်..။ ကျွန်တော်ဟာ နွယ်ပင့်ရဲ့ ကိုယ်စောင့်နတ်လေးတစ်ပါးပါ။ လွန်ခဲ့တဲ့ ဘဝတစ်ခုတုန်းက ချစ်သူတွေ ဖြစ်ခဲ့ပြီး မခွဲမခွာဆုံရပါစေသားလို့ ဆုတောင်းခဲ့လို ခုလိုလာရေစက်ဆုံရတာ...။

                   ကျွန်တော်လည်း သူ့ကိုချစ်နေသေးသလို သူ့မသိစိတ်ရဲ့တစ်နေရာမှာ ကျွန်တော်ရှိနေဆဲပါပဲ ...။

                   ကျွန်တော့်ရဲ့ ကိုယ်စောင့်နတ်အစွမ်းနဲ့ သူ့ရဲ့ တတိယမျက်လုံးအခေါင်းပေါက် (Third Eye Hollow) ထဲက အချက်အလက်တွေကို ပြင်ကြည့်ချင်တယ်...။

                  ကျွန်တော်ပြင်ကြည့်ရမယ်..။ 

                   ဟုတ်တယ်... ကျွန်တော်ပြင်ကြည့်မယ်....။

× × × × × × ×

                   "ကံတရားတွေရှိတဲ့ Third Eye Hollow ထဲကို ဝင်ဖူးတဲ့ ကိုယ်စောင့်နတ်ရှိတယ်ဆိုတာ မင်းကြားဖူးရဲ့လား မိုးစက်..."

                   ဘယ်ကလာမှန်းမသိတဲ့အသံတစ်ခုကိုကြားလိုက်ရတာကြောင့် ကျွန်တော်လည်းပြန်ပြောလိုက်တယ်.။

                  "ခင်ဗျားကဘယ်သူလဲ ...."

                 "ငါကမင်းလိုပါပဲ ... Gothic ရဲ့ ကိုယ်စောင့်နတ်ပေါ့ ..။ တကယ်လို့ မင်းကသာ နွယ်ပင် ရဲ့ Third Eye Hollow ထဲဝင်ပြီး Gothic နာမည်ကို ပြင်ခဲ့ရင် အရာအားလုံးက ပြောင်းလဲသွားလိမ့်မယ် ....၊

                Gothic ရဲ့ ကံကြမ္မာက နွယ်ပင်နဲ့ရမှ ချမ်းသာမယ့် ကံမျိုးရှိတာကြောင့် နွယ်ပင်နဲ့မရခဲ့ရင် Gothic ရဲ့ အနာဂတ်ဘဝ ကြီးတစ်ခုလုံး စုတ်ပြတ်သပ်သွားလိမ့်မယ် ...."

                " တကယ်လို့ နွယ်ပင် သာ Gothic နဲ့ဖူးစာဆုံခဲ့မယ်ဆိုရင်လည်း မယုံနိုင်စရာအဖြစ်ဆိုးတွေ၊ နာကျင်ကြေကွဲမှုတွေ နွယ်ပင့်မှာ ဖြစ်လာရမယ်လေ ...."

                "ဒါပေမယ့် Third Eye Hollow ကိုဝင်ပြင်မယ်ဆိုတာကြီးကကော ကိုယ်စောင့်နတ်စည်းကမ်းကို ချိုးဖောက်ရာရောက်တယ်ဆိုတာ မင်းသိရဲ့လား မိုးစက် ....."

               

               "ကျွန်တော်အဲ့ဒါတွေမသိဘူး .... ကျွန်တော်သိတာက ကျွန်တော်နဲ့နွယ်ပင်နဲ့ အရွယ်ရောက်ချိန် အတူနေရဖို့ပဲ သိတယ် ...။ ဘာတွေဘယ်လိုပဲဖြစ်နေပါစေ.။ ကျွန်တော်နွယ်ပင့်ကိုချစ်တယ် ...။ သူ့ရဲ့ကံတရားကိုပြုပြင်ရမယ် ...."

              ကျွန်တော်တော့ ပြောပြောဆိုဆိုနဲ့ပဲ နွယ်ပင့်ရဲ့ တတိယမျက်လုံးအခေါင်းပေါက်ထဲကို ဝင်သွားလိုက်ပါတယ် ...။ အခေါင်းပေါက်ထဲမှာတော့ ရောင်စဉ်အမျှင်တန်းလေးများစွာက ကူးလူးယှက်ဖြာနေရင်း အချို့ရောင်စဉ်တန်းလေးတွေက အပြင်ကိုတိုးထွက်ပြီး စကြဝဠာနဲ့ချိတ်ကာ နောက်ဘဝဖြစ်မယ့် ကံတရားသို့ပို့ဆောင်ပေးနေသလို ဒီဘဝကံတရားအတွက် အရင်ဘဝမှ သတင်းအချက်အလက်များကိုလည်း လက်ခံရယူနေပါတယ်။ ကျွန်တော် အဲ့ဒီ ရောင်စဉ်အမျှင်တန်းလေးတွေကြားထဲ ဝေ့ဝဲရှာကြည့်လိုက်တယ်။

                  Gothic .. Gothic...။ ရောင်စဉ်အမျှင်တန်းသန်းပေါင်းများစွာထဲမှာ ဒီနာမည်ပါတဲ့ အမျှင်ကိုရှာရတာ ကျွန်တော့်အတွက် အရမ်းကြီးခက်ခဲနေသလားပဲ။ ဒါပေမယ့် ကျွန်တော်ဇွဲလျှော့မှာမဟုတ်ပါဘူး ..။ အမျှင်လေးတစ်ခုက ကျွန်တော့်လက်မောင်းကိုလာဆွဲပြီး လှုပ်ယမ်းလိုက်တယ်။ ကျွန်တော်အဲ့ဒီအမျှင်လေးကိုကြည့်လိုက်တယ်..။ ကျွန်တော်သိတာပေါ့။ Gothic လို့ရေးထားတဲ့ နဖူးစာအမျှင်တန်းသံယောဇဉ်ကြိုးလေးလေ..။ ကျွန်တော်အဲ့ဒီကြိုးကိုဖြတ်ဖို့ကြိုးစားပါလိုက်တယ်။ ကျွန်တော့်လက်ထဲကနေ မီးခိုးရောင်အခိုးအငွေ့အချို့ကိုထုတ်လိုက်တယ်....။ လက်ထဲကမီးခိုးရောင်အခိုးအငွေ့တွေက သံယောဇဉ်ကြိုးကို နက်ရှိုင်းစွာဖုံးလွှမ်းရင်း ဖုံးလွှမ်းရင်းနဲ့ အဲ့ဒီနက်ရှိုင်းမှုက တတိယမျက်လုံးအခေါင်းပေါက်ကြီးတစ်ခုလုံးကို ဖုံးလွှမ်းသွားတယ်။ အခေါင်းပေါက်ကြီးတစ်ခုလုံးလည်းအမှောင်ကျသွားသလို ကျွန်တော့်အမြင်အာရုံတွေလည်း အမှောင်ကျသွားပါတော့တယ်။

                     ကျွန်တော် .... ကျွန်တော် နတ်သက်ကြွေရတော့မှာလား ...။ ဟင့်အင်း ... မဖြစ်နိုင်ဘူးလေ။ ကျွန်တော် ကံတရားကိုမပြင်နိုင်လိုက်ဘူး..။ ကျွန်တော့်ချစ်သူလေး တစ်သက်လုံးနာကျင်ရတော့မှာလား ...။ ကျွန်တော်ကကော ဘယ်လိုဆက်ဖြစ်ဦးမှာလဲ ...။ Gothic ကကော ...။ ကျွန်တော် အသံတွေမကြားရတော့ဘူး...။ ဘာမှမခံစားရတော့ဘူး ...။ နွယ်ပင်နဲ့ ဖြည်းဖြည်းချင်းဝေးလာသလိုခံစားလာရပြီး ကျဉ်းထဲကျပ်ထဲကိုရောက်သွားပြီ။ 

                    ကျွန်တော် .. ကျွန်တော်ဘယ်ရောက်သွားတာလဲ ...။ အကျဉ်းကျသွားတာလား ..။ နတ်သက်ကြွေသွားတာလား ...။

အပိုင်း(၂)ကိုဆက်လက်ဖတ်ရှုပါရန်။

ကာရှိုင်း (ကြယ်စင်ချစ်သူ)

KCB Center

Filed Under: အခန်းဆက် on Friday, January 23, 2015